ഗാന്ധർവ്വം..!

“ഹൊ., എന്റെ ഭഗവതീ... എന്റെ ദേഹം നോക്കൂ.... അവിടവിടങ്ങളിലായി ചുവന്ന പാടുകൾ..... അബോധാവസ്ഥയിൽ എന്ന പോലെ തളർന്നുറങ്ങിയുണരുന്ന  എന്റെ  ശരീരത്തിൽ   നേർത്ത  നോവിന്റെ പാടുകൾ...”

- ആവണി ആരോടെന്നില്ലാതെ പറഞ്ഞു.

“എന്തു പറ്റിയതാ...ആവണി...? നീ സ്വപ്നം കണ്ടുറങ്ങി അല്ലേ..?”

“അല്ല... സ്വപ്നത്തെ  ഊട്ടിഉറക്കി  ഉണർന്നു എന്ന് പറയുന്നതാവും ശരി”

“പിച്ചും പേയും പറയാൻ ഇപ്പൊ എന്തുണ്ടായി.....  കഴിഞ്ഞ  കുറച്ചുകാലങ്ങളായി   ഉറക്കത്തിൽ  നിന്നുണർന്നുള്ള  നിന്റെ പുലമ്പലുകൾ.., ഈ പെരുമാറ്റ വൈകല്ല്യങ്ങൾ.., നിന്റെ ഓപ്പോളിൽ അസ്വസ്ഥതയുണ്ടാക്കുന്നു”

 - ആവണിയുടെ  ഓപ്പോൾ  വ്യാകുലപ്പെട്ടു.

 “ ഒന്നൂല്ലാന്ന് പറയാൻ നിയ്ക്ക് ആവുന്നില്ല.., എന്നാൽ പറയാൻ ധൈര്യവുമില്ല.., എങ്കിലും ഒരു വട്ടം.., ഒരേയൊരു തവണ ഞാൻ പറയാം. കഴിഞ്ഞ നിലാവുള്ള രാത്രികൾ എനിക്കു നൽകിയ പാടുകളാണിത്… സത്യമോ, മിഥ്യയോ എന്ന തിരിച്ചറിവ്  ഇനിയും ആയിട്ടില്ല.... കള്ളമാണെന്നും, കല്ലുവെച്ച നുണകൾ  മെനഞ്ഞെടുക്കുന്നവൾ  ആണെന്നുമുള്ള  അക്ഷേപങ്ങൾ  അരുത്... എന്റെ  സ്വന്തം  വിചാരവികാരങ്ങളിൽനിന്നും  ഉടലെടുത്ത  ജീവിതത്തിന്റെ അർത്ഥങ്ങളും, അനർത്ഥങ്ങളും ആണ്ടിറങ്ങിയിരിയ്ക്കുന്നത്  എന്റെ ഹൃദയത്തിലാണ്.... ആ ഹൃദയത്തെ തൊട്ടുണർത്തുവാനായി   രണ്ട് കണ്ണുകൾ സദാനേരവും എന്നെ ചൂഴ്ന്ന് എടുക്കുന്നു.. മുനയുള്ള  ആ ദൃഷ്ടികളെന്നെ വലിഞ്ഞ്  മുറുക്കുകയാണ്..  ചിന്തകളുടെ  മറവുകളിൽ നിന്നുകൊണ്ട്  ആ  കനത്ത കരങ്ങൾ എന്നെ എത്തിപ്പിടിക്കുവാൻ  ശ്രമിയ്ക്കുന്നു...."

"ഓപ്പോളിന്  അറിയോ……. ഒരിയ്ക്കൽ  ആ ബലിഷ്ഠകരങ്ങൾ വിടുവിയ്ക്കാതെ അവൻ അസ്വസ്ഥനായി"

"നീ എനിയ്ക്കു വേണ്ടി..., ഏകാന്തതയെ കൂട്ട് പിടിയ്ക്കേണ്ടവളല്ല നീ..., നിനക്ക് കൂട്ടിരിയ്ക്കാൻ ഞാനുണ്ട്..."

അവൻ സ്നേഹപരവശനായി..

നിലാവുറങ്ങുന്ന വേളകളിൽ  പല രൂപങ്ങളിൽ അവനെന്നെ നിശ്ചലയാക്കി.

ഒരിയ്ക്കൽ ഞാൻ പൊട്ടിക്കരഞ്ഞു പോയി.....

അപ്പോൾ  ഒരു  പൂത്തുമ്പി ആകാശനീലിമയ്ക്ക് കീഴിൽ മെല്ലെ വട്ടം ചുറ്റി  പറന്നുവന്നെന്റെ തോളിലിരുന്ന്  രഹസ്യമോതി….

"നീ  വ്യസനിയ്ക്കരുത്..നമ്മൾ തമ്മിലുള്ള ബന്ധം സ്ഥാപിയ്ക്കുവാൻ ഞാൻ വേറൊരു മാർഗ്ഗവും കാണുന്നില്ല.. നീ ആലോചിച്ച് നോക്കൂ.. നമുക്ക്  സാധ്യമാവാത്ത   പ്രണയസാക്ഷാത്കാരങ്ങൾ   കാല്പനികതയിൽ പ്രാപിക്കുകയാണ്   ഞാൻ... സുദൃഢമായൊരു ബന്ധം .. എന്നിൽ സ്വർഗ്ഗം സൃഷ്ടിയ്ക്കുന്ന നിന്നിലേയ്ക്ക് ഒരു കീഴടങ്ങൽ..."

ശ്വാസോച്ഛ്വാസങ്ങളിലൂടെ  പ്രണയത്തിന്റെ  തീഷ്ണമായ ഗന്ധം  അപ്പോഴേയ്ക്കും  എന്നിൽ നിറയാൻ  തുടങ്ങിയിരുന്നു..

വാക്കുകൾ തീരുംമുന്നെ അടുത്ത  രൂപകല്പനയായൊരു   ഓന്ത്  എന്റെ കാൽക്കൽ  നിലംപതിച്ചു.... എന്നിട്ട് ഒളികണ്ണാൽ പറയുകയാണ്..

"വാനിൽ പറന്നുയർന്ന് രസിച്ചു ഞാൻ.... നിന്റെ തലക്കുമുകളിലൂടെ  എത്ര തവണ  പറന്ന് ഉല്ലസിച്ചുവെന്ന്  നിനക്കു പോലും അറിയുകയില്ല..  ഇനി ഈ കാൽപാദങ്ങൾക്കിടയിലൂടെ  നിന്നെ വികൃതി കാണിച്ച് രസിപ്പിക്കാൻ പോവുകയാണ് ഞാൻ…."

കാല്പാദങ്ങളെ മുട്ടിയുരുമ്മി അവൻ വാചാലനായി..

"നീ വല്ലാത്തൊരു പെണ്ണ് തന്നെ..., നിന്റെ ആകർഷണശക്തിയുടെ മാന്ത്രികതയിലൂടെ  പലവട്ടം സഞ്ചരിച്ചിട്ടും  എനിയ്ക്കാ  വലയം  പിടിതരുന്നില്ല..... പക്ഷേ,ഒന്നറിയാം..., എന്റെ ഹൃദയം അകാരണമായി തുടിക്കുന്നത്  നിന്‍റെ സാമിപ്യത്തിനു വേണ്ടി മാത്രമാണ്...
ആ കൊതികളും വെമ്പലുകളും നിനക്ക്  പൂർണ്ണമായി ഉൾക്കൊള്ളുവാൻ ആവുന്നുണ്ടൊ എന്ന് എനിക്കറിയില്ല... സ്വന്തമായൊരു നിയതി കൽപ്പിച്ച് നിന്നിലേയ്ക്ക് അലിഞ്ഞുചേരുകയാണ്   ഞാൻ....."

"ഞാൻ ഗന്ധർവ്വൻ..."

"എന്റെ  അമാനുഷിക രൂപം കൊണ്ട് നിന്നിലേയ്ക്ക് എത്തിപ്പെടാനാവാത്തതു മൂലം  പല  രൂപങ്ങളിൽ ഞാൻ പ്രത്യക്ഷനാവുന്നു... "

"വേണമെങ്കിൽ  മുഖമുള്ള  ഒരു  കാർമേഘമാകാം  ഞാൻ.. നനഞ്ഞ മരച്ചില്ലകൾക്കിടയിൽ നിന്നുകൊണ്ട് പ്രണയം വിതയ്ക്കാം നമുക്ക്…."

അവന്റെ  വാക്കുകളെ  അവഗണിക്കാൻ എനിക്ക്  ആകുന്നില്ലായിരുന്നു,
എങ്കിലും പരാതിച്ചെപ്പ് തുറന്ന് മുത്തുമണികൾ തറയിൽ വാരിവിതറി  പരിഭവങ്ങൾ അറിയിച്ചു  ഞാൻ...

"ഹൊ....ഇത് വല്ലാത്തൊരു കുസൃതി ..... നീ എനിക്കായ് നൽകുന്ന ദർശനങ്ങൾ ആണോ ഈ പാറ്റകളുടേയും ഇഴജന്തുക്കളുടേയും വേഴ്ച്ചകൾ.. ഞാനീ വാർത്തകൾ  ലോകരോട് എങ്ങനെ പറയും.."

ഞാൻ പോലും അറിയാതെ  അവന്റെ  സ്നേഹസ്പർശലഹരിയുടെ മായാജാലം  എന്നിൽ നിറയാൻ തുടങ്ങിയിരുന്നു...

"വിണ്ണിലും മണ്ണിലും അപകടക്കണ്ണുകൾ....."

എന്റെ ഭയങ്ങളെ തല്ലിക്കെടുത്തുവാൻ  അവൻ  ശ്രമിച്ചുകൊണ്ടേയിരുന്നു..
 പേടി മണക്കാത്ത  ദിനങ്ങളിൽ  കളിതമാശകൾ പറഞ്ഞ്  അവൻ എന്നെ രസിപ്പിച്ചു...

"ഹൊ..ഇങ്ങനെയൊരു ബുദ്ധിയില്ലാത്ത പ്രണയ ജീവി.. ഗന്ധർവ്വ ജന്മം പോലും.."

 ചിലപ്പോൾ ശാസിച്ചു.....

"സ്നാനം നടപ്പിലാക്കാനെങ്കിലും നീ എന്നെ സ്വതന്ത്രയാക്കൂ.. കുളിയറയിൽ കൂട്ട് ഞാൻ ശീലിച്ചിട്ടില്ല... ഉടുമുണ്ട് മാറ്റിയുടുക്കാൻ നീ എന്നെ അനുവദിയ്ക്കൂ...."

 പലപ്പോഴും പിണക്കം കാണിച്ചു..

"ഇല്ല...നിന്റെ കാവൽ ഭടനായി  കുളിമുറിച്ചുമരിൽ  ഒരു  ഈയ്യാമ്പാറ്റയായി ഞാൻ അള്ളിപ്പിടിച്ചിരിക്കും.."

അവൻ  ഊറിച്ചിരിച്ചു..

ഒട്ടും നിനച്ചിരിയ്ക്കാതെ ആയിരുന്നു  ആപത്ത്..

ഒരു ഗൌളിയ്ക്ക് ഇരയായി അവൻ പിടയുന്നു..

മരണ വേദന എന്തെന്ന് നിനക്കറിയുമോ  എന്ന് അവൻ കളി  ചോദിച്ചത് അറം പറ്റിയോ ഈശ്വരാ...  

ആ പിടച്ചിൽ  കണ്ട് എന്റെ ഞരമ്പുകൾ വലിഞ്ഞ് മുറുകുന്നു..

"ദയവു ചെയ്ത് അവനെ വെറുതെ വിടൂ.."

ആദ്യം  അലമുറകൂട്ടി..പിന്നെ അവശയായി നിലത്തു വീണു.

മാനത്ത്   മായാജാലം കാണിയ്ക്കുന്നവൻ, മണ്ണിൽ  ആധിപത്യം നേടിയവൻ ഇതാ മരണവേദനകൊണ്ട്  പിടയുന്നു..

അടക്കി നിർത്താനാവാത്ത വികാരവിക്ഷോഭത്തോടെ തരിച്ചിരുന്നുപോയി..!

എങ്ങു നിന്നോ ഇരമ്പിയടിച്ചാഞ്ഞുവീശിയ ആവേശം..

ഞൊടിയിടയിൽ വിരൽത്തുമ്പുകൾ കൊണ്ട് ഗൌളിയുടെ ചെന്നിയിൽ അമർത്തി,വായ് പിളർത്തി ആ പൊൻചിറകുകൾ  മോചിപ്പിച്ചു!

പൊൻചിറകുകൾ ഉയർത്തി സ്വതസിദ്ധമായ ചിരിയോടെ കൂസലില്ലാതെ  ഇയ്യാമ്പാറ്റ  പറന്നുവന്ന് തോളിലിരുന്നു..

"ദയവു ചെയ്ത് നിന്റെ തനിരൂപം സ്വീകരിയ്ക്കു... ഈ വേദനകൾ കൂടി താങ്ങാനുള്ള ത്രാണി എനിയ്ക്കില്ല.."

ഈയ്യാമ്പാറ്റ തോളിൽ നിന്ന്  തലമുടിയിഴകളിലേയ്ക്ക് പറ്റിച്ചേർന്നു..
പിന്നെ...കണ്ണടച്ച് തുറക്കുംമുന്നെ ഒരു മിന്നാമിനുങ്ങായി ഒരു വൈരക്കല്ലെന്ന പോലെ മൂക്കിൽ പതിഞ്ഞിരുന്നു..

നിമിഷങ്ങൾക്കകം .. അതാ...എന്റെ മടിത്തട്ടിൽ ഒരു ചെറുപ്പക്കാരനായി അവൻ വിശ്രമിയ്ക്കുന്നു..

 കണ്ണുകളിൽ  ഉറ്റുനോക്കി വിരലുകൾ പിടിച്ചെടുത്ത് വിടർത്തി വിരലുകൾക്കിടയിലൂടെ വിരലുകൾ കോർത്ത്കൊണ്ട് അവൻ ചോദിച്ചു,

"നിനക്ക് അറിയുമോ പ്രിയേ…. ആകാശത്ത് പറക്കുന്ന പ്രാണികൾക്കും മണ്ണിൽ ഇഴയുന്ന ജന്തുക്കൾക്കും വരാനിരിയ്ക്കുന്ന അപകടങ്ങൾ  മുൻകൂട്ടിത്തന്നെ അറിയാം.. എന്നാൽ  ചിറകുകൾ ഒതുക്കി ആഹ്ലാദങ്ങൾ ഇല്ലാതാക്കാൻ  അവ  ശ്രമിയ്ക്കുന്നില്ല.."

"പ്രണയത്തിന്റെ വഴികളിൽ അപകടങ്ങൾ പതിയിരിപ്പുണ്ട്.... എന്നാൽ പ്രണയം സത്യമാണ്..  മിന്നിത്തെളിയുന്ന കർക്കിടകസന്ധ്യയിലെ നക്ഷത്രങ്ങൾ പോല അത് ജ്വലിച്ചു നിൽക്കും..... ക്ഷമിയ്ക്കെന്റെ തങ്കം..."

 - ഓപ്പോളിന്റെ  കണ്ണുകൾ  ഭയപ്പാടോടെ  വിടർന്നു..

"അതെ....ആനന്ദമാണിത്  ഓപ്പോളെ.... ആവണി ഒരു ഗന്ധർവ്വനാൽ പ്രണയിക്കപ്പെട്ടിരിക്കുന്നു..... ഗാന്ധർവ്വവിധി  പ്രകാരം ഞങ്ങൾ വിവാഹിതയായിരിയ്ക്കുന്നു.. സങ്കീർണ്ണമെങ്കിലും എത്ര സുഖകരം ഈ പ്രണയാനുഭവങ്ങൾ..!”

മനക്കോട്ടകൾ കെട്ടി.. പ്രണയ സാഫല്യമറിഞ്ഞ്.. ആശകളെ ചിറകുകളിലൊതുക്കി... പുതുപ്രതീക്ഷകളെ  ആവണി ആലിംഗനം ചെയ്യുകയാണ്..

- പുലരിയുടെ വിളർച്ചയാർന്ന തണുപ്പിൽ നിഗൂഢമായ  ഗന്ധങ്ങൾ ഭൂമിയിൽ പരന്നു..

- മഴ സ്പർ‍ശമേറ്റ് നനുത്ത ഓർമ്മകൾ ചില്ലുജാലകത്തിലൂടെ ഒലിച്ചിറങ്ങി....