കൂടപ്പിറപ്പ്..

അറിയാതെ വീണോരു മുഴുത്ത നെല്ലിക്ക

മരത്തീന്നല്ലാ ഒരോട്ട പോക്കറ്റീന്ന്

പെറുക്കിയെടുത്തോടുന്നിടെ ഇരടി വീണു

പിടഞ്ഞെഴുന്നേല്‍ക്കുന്നിടെ രണ്ട് കടി കൂടി

ശ്ശൊ ,മുഴുത്തതാണേലും എന്തൊരു കശപ്പ്

തിരിഞ്ഞു നോക്കാതോടി കിണറ്റിന്‍ കരയില്‍

ഹാവൂ ഒരു പെണ്ണിന്‍ തല പോലുമില്ലവിടം.

ഇഴകള്‍ പിരിച്ചെടുത്ത കയറിന്നറ്റം തള്ളി

ഒന്നാഞ്ഞു വലിച്ചതും അര പാള വെള്ളം

കുടു കുടേ മോന്തി കുടിച്ചോരോ മുടുക്കിലും

രുചിച്ചു ഹായ് എന്തൊരു നറു മധുരം.

പ്ലാവില പൊങ്ങി നീന്തുമാ തെളിനീരില്‍

വെറുതനെയൊന്ന് എത്തി നോക്കി

വാല് പോലുമില്ലാത്ത മാക്രി പടകളും

ജാരനായ്  തല കാട്ടും നീര് ക്കോലി കുഞ്ഞും

പിന്നെ പുളയ്ക്കും പരല്‍ മീന്‍ കൂട്ടങ്ങളും

മിഴികള്‍ കണ്ടേന്‍ തുളുമ്പും വിനോദം

സ്വയം മറന്നങ്ങനെ നിന്നു പോയി.

പൊടുന്നനെ മുതുകിലൊരു ഏറ് കൊണ്ടു

അമ്മേന്നറിയാതെ വിളിച്ചു പോയി

ഉന്നം പിടിച്ചവന്‍ നില്‍ക്കുന്നു പിന്നേം

എടുക്കടീ ന്റ്റെ നെല്ലിക്ക എന്നഹങ്കാരം

അപ്പുറത്തൊരു നിഴലാട്ടം കണ്ടതും

രക്ഷയ്ക്കായ് ഓടിയാ തണലില്‍ അഭയത്തിനായ്.

എന്‍റെ സഹോദരന്‍റെ കാര്യാണ്‍...ഭയങ്കര പോക്കിരിയായിരുന്നു.

ഒരു അവധി കാലത്ത് ചെറിയമ്മേടെ വീട്ടില്‍ പോയപ്പോള്‍ ഉണ്ടായ സംഭവമാ..
ഓര്‍ത്തപ്പോള്‍ രസകരമായി തോന്നി..
മാത്രല്ല അവന്‍റെ പിറന്നാള്‍ അടുക്കുന്നൂ..
ഒരു കുഞ്ഞ് ഓര്‍മ്മ കുറിപ്പ് സമ്മാനം ന്റ്റെ വക..:)