അളിവേണി…!

“നിന്റെ മുടിയിഴകളിൽ ഞാൻ ചുംബിയ്ക്കുന്നു..
ഈ പട്ടു നൂലുകൾക്കിടയിലൂടെ വിരലുകൾ ഒഴുകുമ്പോൾ ഓരോ ഇഴകളേയും വേറിട്ട് എണ്ണിയെടുത്ത് കണ്ണുകളിൽ തൊട്ട് ചുംബിപ്പിയ്ക്കുവാൻ തോന്നിപ്പിയ്കുകയാണ്.”

“എന്തിനാ അങ്ങനെ തോന്നിപ്പിയ്ക്കുന്നത്…പെൺകുട്ടികളുടെ മുടിയിഴകൾ എവിടെയെങ്കിലും കണ്ടാൽ ‘അശ്രീകരം’ എന്നേ അച്ഛൻ തുടങ്ങൂ..
അത്രയ്ക്ക് ദേഷ്യാണ്…കണ്ണു തുറിയ്ക്കും..
ഭക്ഷണത്തിൽ എങ്ങാനും ഒരിഴ പെട്ടാൽ….ഈശ്വരാ…പറയും വേണ്ട…
എനിയ്ക്കാണേൽ അത് കാണുന്നതേ പേടിയാ…!
കുഞ്ഞു നാളുകൾക്ക് മുതലുള്ള എന്റെ ധാരണ ആണുങ്ങൾക്കൊന്നും പെണ്ണുങ്ങളുടെ മുടിയഴക് കാണുന്നത് ഇഷ്ടല്ലാന്നാ..
അതു കൊണ്ടല്ലേ അമ്മ എപ്പോഴും പറയുന്നത്..
പെൺകുട്ടികൾ എണ്ണ തേച്ച് മിനുക്കി മുടി ഒതുക്കി കെട്ടി വെയ്ക്കണമെന്ന്..
തലയിൽ പൂ ചൂടുന്നത് മുടിയഴക് കൂട്ടാനല്ല മുടിയിഴകൾ മറയ്ക്കാനാണെന്നു പോലും അമ്മ ഇടയ്ക്കിടെ ഓർമ്മിപ്പിയ്ക്കും..
‘കണ്ടിട്ടില്ലേ…മുടി മറച്ചു നടക്കണ മുസ്ലീം പെൺകുട്ട്യോളെ…എന്തു ചേലാ…‘അതാണ് അമ്മ പറയുന്ന ന്യായം..!
ഇന്നേവരെ ഞാനെന്റെ തലമുടിയിഴകൾ സ്പർശിയ്ക്കാൻ ആരേയും അനുവദിച്ചിട്ടില്ല..
കളികൾക്കിടയിൽ അനിയൻ കുട്ടി വന്ന് തലയിൽ തൊട്ടാൽ പൊലും ഞാൻ ഈർഷ്യ കാണിയ്ക്കും.
എന്നാൽ എന്റെ തലമുടിയുടെ അഴക് ഞാൻ സ്വയം ആസ്വാദിയ്ക്കുമായിരുന്നു..
എങ്ങനെയെന്നോ..
കിടക്കാൻ നേരം അമ്മ പറയും..
“കുട്ട്യേ മുടിയിലെ കെട്ട് കളഞ്ഞ് മുടി കേറ്റി കെട്ടി ഉറങ്ങാൻ കിടക്കണം ട്ടൊ” എന്ന്..
അത് കേൾക്കണ്ട താമസം ചുവരിൽ തൂക്കിയിട്ടിരിയ്ക്കുന്ന കൊച്ച് കണ്ണാടിയുടെ മുന്നിൽ നിന്ന് ഞാൻ മുടിയുടെ കെട്ടുകൾ തീർത്ത് ലൈറ്റണയ്ക്കും..
ആരും കാണാതെ ഇരുട്ടിനാണൊ അതൊ എന്റെ മുടിയ്ക്കാണൊ കൂടുതൽ നിറവും തിളക്കവും എന്ന് പരീക്ഷിച്ച് സ്വയം ആനന്ദിയ്ക്കും..
അപ്പോഴേയ്യ്ക്കും അമ്മ വന്ന് ശാസിയ്ക്കും..
“കറന്റിൽ കളിച്ച് നിക്കാണ്ട് പോയി കിടക്ക് കുട്ട്യേ “എന്ന്..
പാവാണ് അവർക്ക് അറിയില്ലല്ലോ രഹസ്യായി ഞാൻ എന്തെല്ലാം കളികൾ കളിയ്ക്കുന്നുവെന്ന്..
ഞാൻ ഒരു വല്ലാത്ത നാണക്കാരി പെൺകുട്ടിയാണെന്ന ധാരണയൊന്നും അവർക്കില്ലാ ട്ടൊ..
എന്നാലും ഉദാസീനയായി ചെമ്പക മരത്തിന്റെ ചുവട്ടിൽ ഇരിയ്ക്കുന്നതു കണ്ടാൽ അവർ ആകുലരാകും..
പക്ഷേ, അവർക്കുണ്ടോ അറിയുന്നോ ആ ചെമ്പക മണം എന്റെ മുടിയഴകളിൽ ഭദ്രമാണെന്ന്..“
നിന്നോടൊത്ത് അധിക നാളുകൾ ചിലവഴിയ്ക്കാൻ എനിയ്ക്കായിട്ടില്ല..
ഈ നിമിഷങ്ങൾ എന്റെ ആശകൾ നിറവേറാനുള്ള നിമിഷങ്ങൾ മാത്രമാണെന്ന് ഞാൻ മനക്കൂട്ടി വെച്ചിരിയ്ക്കുകയാണ്..
ഈ സ്പർശനത്തിൽ ഞാൻ ആഗ്രഹിച്ച സകല സുഖങ്ങളും നേടിയെടുത്തുവെന്ന ഗർവ്വോടെ ജീവനുള്ള ഒരു പാവയായി ഈ മടിയിൽ തല ചായ്ക്കുകയാണ് ഞാൻ…!

“അണിവേളി എന്തു ചെയ് വൂ
ഹന്ത മാമക ദയ്തൻ എന്നെ മറന്നോ..”
എന്റെ കൂട്ടുകാരി അവളുടെ വിരഹം അറിയിച്ചപ്പോൾ ഞാൻ അവളെ കളിയാക്കി..
എന്നാൽ ഞാൻ ഇപ്പോൾ ഭയക്കുന്നു,,
ഈ വരികൾ ഞാൻ ഏറ്റു ചൊല്ലേണ്ടി വരുമോ…
അവളുടെ കളിയാക്കലുകളേയും ഞാൻ ഭയക്കുന്നു..
ഹൊ..അന്നെന്റെ അന്ത്യം...!”



“നാരി തൻ അഴക് കേശം എന്നത് നേര് തന്നെ …
എന്നാലത് അലിഖിതമാണ് താനും..
അവൻ പുഞ്ചിരിച്ചു..
നാളെ ഈ നേരം കൊണ്ട് നിനക്ക് നഷ്ടമാകും കേശ ഭാരത്തെ കുറിച്ചോർത്ത് നിന്റെ ഉണ്ട കണ്ണുകൾ ഈറനണിയിയ്ക്കേണ്ട..
ദീനം വന്നാൽ ചില ചെയ്തികൾ അനിവാര്യമെന്ന് നീ അറിയുക…!
ഇന്ന് ഞാൻ ഒരു വനത്തിലെ പടുവൃക്ഷത്തെ വെട്ടി മാറ്റി എന്റെ വീട്ടു മുറ്റത്ത് നട്ടു എന്ന് കരുതുക നീ..
ഏകാന്തത സഹിയ്ക്കാൻ വയ്യാതാകുമ്പോൾ അവൻ വിരഹാർത്തിയാൽ ചുരുങ്ങി ഒരു ചെടിയാകുന്നു..
പിന്നേയും മനോഭാരത്താൽ ചുരുങ്ങി ഒരു വിത്തായി മണ്ണിൽ പതിയ്ക്കുന്നു..
എന്നാൽ അല്പം സം രക്ഷണവും നനവും ലഭിച്ചാൽ ആ വിത്ത് കിളിർത്ത് മണ്ണിനു മുകളിൽ രണ്ട് തളിർ ഇലകളുടെ ഗമയാൽ എത്തി നോക്കുമ്പോൾ നീയും ഞാനും മണ്ണും മരവും സന്തോഷിയ്ക്കുന്നു..
നിനക്ക് നാളെ നഷ്ടമാകും ഈ കൂന്തൽ ഭാരവും ഏതാനും ദിനങ്ങൾക്കകം നിനക്ക് കോതി മിനുക്കാനായി തഴച്ചു വളരും..എന്നേയും നിന്നേയും നമ്മുടെ ഭാവിയേയും ഭദ്രമാക്കാൻ..!“

“ഇന്ന് ഞാൻ നിന്റെ കൂന്തലിനോട് കാണിയ്ക്കാത്ത മതി മറക്കും അഭിനിവേശവും മതിപ്പും അന്നു ഞാൻ നിന്നെ അമ്പരിപ്പിയ്ക്കും വിധം പ്രകടമാക്കും..
നീലഭൃംഗാതി എണ്ണ മുടിയിയകളുടെ വേരിൽ പിടിപ്പിച്ച് ,ചെമ്പരത്തി താളിയാൽ മെഴുക്ക് കളഞ്ഞ് പട്ട് നൂലുകൾ സംരക്ഷിയ്ക്കും പോലെയുള്ള ആ ജോലി എന്റേതു മാത്രമായിരിയ്ക്കും..
നീ നാട്ടുവഴിയോരത്തിലൂടെ നടന്ന് നീങ്ങുമ്പോൾ നിന്റെ കേശാലങ്കാരത്തെ നോക്കി അസൂയ കൊള്ളുന്ന ചിലരോടെങ്കിലും ഞാൻ പറയും ആ അഴക് എനിയ്ക്ക് സ്വന്തമാണെന്ന്..
അവരുടെ പരിഹാസത്തെ ഞാൻ അമർഷം കൊണ്ട് കുത്തി കീറും..
നിന്റെ ഈറൻ മുടി ഉണക്കാനായ് പിന്നാമ്പുറ മുറ്റത്ത് നീ ഇളംവെയിൽ കായുമ്പോൾ എത്തി നോക്കും അയൽക്കാരി പെണ്ണുങ്ങളുടെ കണ്ണിന് ഉപ്പും മുളകും ചുറ്റിയിടാൻ ഞാൻ അമ്മയോട് സ്വകാര്യം പറയും..
പിന്നെ നമുക്ക് ഈശ്വരൻ കനിയുന്ന പൊന്നോമന അച്ഛനെ തേടി മുട്ടിലിഴഞ്ഞ് കൊഞ്ചി വരുമ്പോൾ അകത്തള ഊഞ്ഞാലിൽ മാസിക വായിച്ച് കിടക്കുന്ന നിന്റെ ഒഴുകുന്ന മുടിയഴകിൽ ഒരു കള്ളനെ പോലെ ഒളിച്ചിരിയ്ക്കും ഞാൻ..
ഇനി ഒരു രഹസ്യം കൂടി..
നമ്മുടേതായ നിമിഷങ്ങളിൽ എന്നെ ഭ്രാന്തു പിടിപ്പിയ്ക്കും നിന്റെ ചെമ്പകം മണക്കും കൂന്തൽഭാരം അഴിച്ച് ഒരു മെത്തയാക്കി അതിൽ ശയിയ്ക്കും ഞാൻ..
അപ്പോഴേയ്ക്കും എന്റെ ജീവിത താളുകളിൽ നിന്റെ മുടി ചുരുളുകൾ നിർബന്ധമായി തീർന്നിരിയ്ക്കും..
നീ എന്റെ അളിവേണി…
കറുത്ത വണ്ടുകളെ പോലെ ചുരുണ്ട മുടിയഴക് ഉള്ളവൾ..
“അണിവേളി എന്തു ചെയ് വൂ
ഹന്ത മാമക ദയ്തൻ എന്നെ പുണർന്നൂ..“
നിന്റെ സഖിയോട് നിനക്കും കിന്നരിയ്ക്കാം..

എല്ലാം മറന്നൊരു ഗീതം അവൾക്കായ് പാടി തീർത്തു..
നെറുകയിൽ കുങ്കുമവും ചുണ്ടുകളിൽ പുഞ്ചിരിയും നീണ്ട വിരലുകൾക്കുള്ളിൽ മുടി കെട്ട് ഭദ്രമാക്കി അവൾ ഉറങ്ങി..!